ఏపీ ప్రభుత్వం మూడో శ్వేతపత్రం విడుదల

Published: Tuesday December 25, 2018

ఏపీ ప్రభుత్వం మూడో శ్వేతపత్రాన్ని విడుదల చేసింది. మంగళవారం అమరావతిలో ముఖ్యమంత్రి చంద్రబాబుసంక్షేమ కార్యక్రమాలు, సాధించిన ప్రగతిపై పత్రాన్ని విడుదల చేశారు సీఎం. ఈ సందర్భంగా మాట్లాడిన సీఎం.. బడ్జెట్‌లో సంక్షేమానికి పెద్దపీట వేశామన్నారు. వెనుకబడిన వర్గాల కోసం ప్రత్యేకంగా కార్పొరేషన్ ఏర్పాటుచేసి.. వారికి భరోసా ఇస్తున్నామన్నారు. పేదరికంపై గెలుపు కార్యక్రమంతో ఆర్థిక అసమానతలను తొలగిస్తూ.. పేదరికం లేని సమాజం కోసం కృషి చేస్తున్నామన్నారు. అంబేడ్కర్ స్ఫూర్తిగా ఈ సంక్షేమ కార్యక్రమాలు చేపట్టామని చెప్పారు.
పండగలొస్తే అన్ని వర్గాల వారికి కానుకలు ఇస్తున్నామన్నారు చంద్రబాబు. పౌష్టికాహారం విషయంలో రాజీపడటం లేదని.. అలాగే దేశంలో ఎక్కడా లేని విధంగా చంద్రన్నబీమా అమలు చేస్తున్నామని తెలిపారు. అన్నా క్యాంటీన్ల ద్వారా రూ.5కే భోజనాన్ని అందిస్తున్నామన్నారు. డ్వాక్రా సంఘాలకు రూ.10వేల చొప్పున ఆర్థిక సాయం చేశామని.. రైతులు ఇబ్బందుల్లో ఉన్నారని గ్రహించి ఒక్కో రైతుకు రూ.1.50 లక్షల చొప్పున మొత్తం రూ.24 వేల కోట్లు రుణమాఫీ చేశామని గుర్తు చేశారు. ఎన్టీఆర్ వైద్యసేవలు అందిస్తూ.. రాష్ట్రంలో ఆరోగ్య వ్యయం గణనీయంగా తగ్గించగలిగామన్నారు. పెద్ద ఎత్తున సంపద సృష్టించగలిగితే పేదరికాన్ని తొలగించొచ్చు అన్నారు సీఎం. సంక్షేమ కార్యక్రమాల ద్వారా ఆదాయం పెంచే చర్యలు చేపట్టామన్నారు. రాష్ట్రంలో ప్రతి కుటుంబం నెలకు రూ.10వేలు ఆదాయం సంపాదించేలా పేదరిక నిర్మూలనకు కృషి చేస్తున్నామని తెలిపారు. ఏ ప్రయోజనం కల్పించినా మహిళ పేరుతో అందించేందుకు ప్రయత్నిస్తున్నామన్నారు. కుటుంబ వికాసం, సమాజ వికాసం వంటి కార్యక్రమాలు అమలు చేస్తున్నామన్నారు. సంక్షేమ కార్యక్రమాలపై నిరంతర నిఘా కోసం గ్రామదర్శిని, గ్రామ వికాసం, జన్మభూమి వంటి కార్యక్రమాలు చేపడుతున్నామన్నారు సీఎం. 2014కు ముందు ఎలాంటి సంక్షేమ కార్యక్రమాలు ఉన్నాయి?.. ఇప్పుడు అమలవుతున్న కార్యక్రమాలు ఎలా ఉన్నాయో ఓసారి బేరీజు వేసుకోవాలన్నారు. ఆదాయం లేని వారికి నిరంతరం అండగా నిలుస్తామని.. పింఛన్లను పెంచే విషయమై ఆలోచిస్తామన్నారు.

 

కొవ్వూరులో ప్రతి రోజు వార్తలు తెలుసుకోవడానికి kovvurnews.com చూడండి ,మీ mobil లో google app store నుండి kovvurnews app downlode చేసుకోండి